Монгол Улсын Засгийн газар, Европын сэргээн босголт, хөгжлийн банк хоорондын Санхүүжилтийн ерөнхий хэлэлцээр

ЭНЭХҮҮ ХЭЛЭЛЦЭЭРИЙГ 2019 оны 04 дүгээр сарын 09-ний өдөр

(1) Нэг талаас, МОНГОЛ УЛСЫН ЗАСГИЙН ГАЗАР, түүнийг төлөөлж Монгол Улсын Сангийн яам (цаашид “Засгийн газар” гэх); болон (2) Нөгөө талаас, олон талт хэлэлцээрийн хүрээнд байгуулагдсан олон улсын байгууллага болох ЕВРОПЫН СЭРГЭЭН БОСГОЛТ, ХӨГЖЛИЙН БАНК (цаашид “ЕСБХБ” эсхүл “Банк” гэх) нарын хооронд байгуулав. Удиртгал: (A) ЕСБХБ нь 1990 оны 05 дугаар сарын 29-ний өдрийн Банкийг үүсгэн байгуулах тухай хэлэлцээр (“цаашид “Банкийг үүсгэн байгуулах хэлэлцээр” гэх)-т заасныг үндэслэж олон улсын нийтийн эрх зүйн дагуу байгуулагдсан олон улсын байгууллага бөгөөд Монгол Улс Банкийг үүсгэн байгуулах хэлэлцээрт нэгдэн орж, 2000 оны 08 дугаар сарын 10-ны өдөр ЕСБХБ-ны гишүүн улс болсон. (B) Засгийн газар нь ЕСБХБ-ны Захирлуудын Зөвлөлийн 2017 оны 06 дугаар сарын 07-ны өдрийн хуралдаанаар батлагдсан Монгол Улстай хамтран ажиллах Стратегийн баримт бичгийн дагуу дэд бүтэц, зам тээврийн салбарын төслүүдийг санхүүжүүлэхэд ЕСБХБ-тай үргэлжлүүлэн хамтран ажиллахаа баталгаажуулж, илэрхийлсэн. (C) Банк нь Засгийн газарт удиртгал (B)-д тусгасан салбарт төсөл арга хэмжээ (цаашид “Төсөл” гэх)-д нийт 300,000,000 ам.доллараас хэтрэхгүй хэмжээний Засгийн газрын зээл (тус бүрийг “Зээл” гэх)- ийг олгох замаар санхүүжилт олгож болно. Ийнхүү санхүүжүүлэх Төсөл тус бүрийг Банк Засгийн газартай харилцан тохиролцож тухай бүр тодорхойлох бөгөөд санхүүжилтийг тусгайлсан зээлийн хэлэлцээр (“Зээлийн хэлэлцээр” гэх)-ийн дагуу олгоно. (D) Банк нь Засгийн газартай (дор тодорхойлсон) Санхүүжилтийн хэлэлцээрийг Төсөл тус бүрт байгуулахтай холбогдуулан, Засгийн газар нь Төсөл тус бүрт энэхүү хэлэлцээрийн 2, 3 дугаар зүйлд заасан нөхцөлийн дагуу дэмжлэг үзүүлэхээр тохиролцсон болно.